ගීතයක සැකිල්ල

මම ගීත ගැන
හිතාමතා සොයන්නෙ
විශ්ලේෂණය කරන්නෙ නැහැ,

කොහොමත්
මම අද කාලෙ
ලංකාවෙ කරන
කිසිම නිර්මාණයක් පිළිබඳව
උනන්දු නැහැ.

අද හැම ක්ෂේත්‍රයකම නිර්මාණකරුවන්
ගැහැණුන්ට, මත්පැනට, මුදලට,
ගරු නම්බුවලට, ප්‍රතිරූප පිම්බීමට,
බාහිර සැපසම්පත් වලට යටත්.
ඔවුන්ගෙ නිර්මාණ වල කොයි විදියෙන් හෝ
එම උවමනාවල් ඉටු කරගන්නට උත්සාහ කිරීමක්
එළිපිට හෝ වක්‍රව තියනවා.
ඔවුන්ගෙ දක්ෂකම් ඔහුටම කත් අදිනවා.

ලංකාවෙ මෙතෙක් බිහිවූ
කලාකරුවන් අතර
මගේ හදවතට
වඩාත්ම සමීප කලාකරුවා
ප්‍රේමකීර්තියි.

නිර්ව්‍යාජ කලාකරුවෙක් විදියටත්,
නිර්ව්‍යාජ මිනිසෙක් විදියටත්
වෙනත් කිසිවෙකුට
ඔහු තරම්
මගේ හද සසල කරන්නට සමත් වූ
අන් කිසිවෙක් නැහැ.

අද කාලෙ නම්
නිර්ව්‍යාජ නිර්මාණ
දකින්නට ලැබෙන්නෙ නැහැ.
ඔවුන්ගෙ නිර්මාණ
කිසිවක් මිළදී ගන්නට මුද්‍රණය කරන
හොර නෝට්ටුවක් වගෙයි.

 යසනාත්ගේ ගීතවල
මා දුටු විශේෂයක්
නොකියා බැරි තරම් වැදගත් නිසා කිව යුතුමයි සිතුණා.
මේ යසනාත්ගෙ බ්ලොග් සටහනින්.

[[[කිඳුරු ගීතය ලියන්නට හේතුවුණේ
රත්න ශ්‍රී විජේසිංහයන්ගේ මේ ගීතයයි.

සොඳුර නුඹ ලිහිණියක - රැයේ අඳුරට හඬන
මමද ලිහිණියෙකු වෙමි - කැඩුණු තටු පිරිමදින

අහිංසක අප දෙදෙන - තටු කඩා මේ ලෙසින
සිඳී ගිය ගඟ දෑල - හැර දැමූයේ කවුද
සඳට දොස් නොකියන්න - සඳ කුමක් කරන්නද
බාල වයසින් මැරුණු ප්‍රේමයකි - තරු එළිය....

කටුක දුක් විරහ මැද - අතරමං වී ගියද
අපි තවම පෙම් කරමු අපේ ජීවිත වලට
කියා දෙමු පියඹන්ට අපි අපේ පැටවුනට
නිදහසේ තටු ලැබුනු කුරුල්ලන් වී දිනෙක]]]

මේ යසනාත්ගේ කිඳුරු ගීතය...
සඳ කිඳුරු ලිය නුඹ
සඳ කිඳුරාණ නුඹ
අහිමි වූ - අහිමු වූ
පුන් සද වත අහිමි වූ
සඳ කිඳුරු ලිය නුඹ

මේ ගං දෑලවර
මල් - මල් උයන්තෙර
සිසිල අහිමිව වැලපෙනා
සඳ කිඳුරු ලිය නුඹ - සඳ කිඳුරාණ නුඹ

මේ නිල් වියන යට
නිල් විල් දියඹ මත
නිල්ල අහිමිව වැලපෙනා
සඳ කිඳුරු ලිය නුඹ - සඳ කිඳුරාණ නුඹ

පද : යසනාත් ධම්මික බණ්ඩාර.
ස්වර : නවරත්න ගමගේ.
ගැයුම: කිත්සිරි ජයසේකර/හේමන්ති රණසිංහ.
====================================

මේ දෙක අතර විශාල වෙනසක් තියනවා.
ඒ වෙනස රචකයන් දෙදෙනා
වෙනස්වීම කියන කරුණ
අමතක කරමු.

මේ දෙකම ලිව්වේ එකම රචකයෙක් කියා
දැනට උපකල්පනය කරමු.

රත්න ශ්‍රී විජේසිංහගේ ගීතය
1, එකිනෙකාට අහිමි වූ පෙම්වතුන් යුවළක්.

2, ඔවුන්ට කිසියම් දුකක් පැමිණි බව.
ඒ දුකට කිසිවෙකුට දොස් නොකිව මනා බව.

3, ඔවුන්ගේ පෙම මිය නොගිය බව.
ඔවුන්ට අහිමි වූ ලොව ජයගන්නට
දරුවන්ට හුරු කරන බව.

මේ යසනාත්ගේ ගීතය..
1, එකිනෙකාට අහිමි වූ පෙම්වතුන් යුවළක්.

2, එකිනෙකාට අහිමි වූ පෙම්වතුන් යුවළක්.

3, එකිනෙකාට අහිමි වූ පෙම්වතුන් යුවළක්.

මේ පුනරුත් දෝෂය
යසනාත්ගේ මා දුටු ගීත වල
මට දකින්නට ලැබුණා.
වචන ලස්සණයි.
මවන රූප තුන ලස්සණයි.
රූප තුනම එකාකාරීයි.
වළකුළු බැම්මෙ කොටස් තුනක් වගෙයි.
එක කොටසකට සවන් දුන්නාම ඇති.
කොටස් තුනෙන්ම
හැඟීම අතින් එකම ප්‍රතිඵලයක්.

රත්නශ්‍රීගේ ගීතය
පේසා වළලු,
දාගැබ, දේවතා කොටුව..
කොත, සිළුමිණ ආදී වශයෙන්..
එකක් මත එකක්
විවිධත්වයෙන් තැනූ
දාගැබක් වගෙයි.

ප්‍රේමකීර්තිගේ මෙවැනි ගීත තියනවා.
වික්ටර් රත්නායකයන් ගයන
කුරුල්ලන්ට ගී ගයන්න ගීතය එවැන්නක්.
පටිගත කල දින උදා කල ලිවූ එම ගීතයේ
අපට පුන පුනා කී රූ වර්ණනාවට
අති විශාල අරුතක්
අපව විශ්මයට පත් කරමින්.
ඔහු එහි අවසාන පේළි දෙකෙන් ලබා දෙනවා...

කුරුල්ලන්ට ගී ගයන්න ඔබෙ කට හඬ දෙන්න
නෙළුම් විලේ මල් පිපෙන්න ඔබෙ දෙකොපුල දෙන්න
මැණික් වලට දිස්නෙ දෙන්න ඇසේ කැළුම් දෙන්න
නා දල්ලට පාට එන්න ඔබෙ තොල් පෙති දෙන්න

ගලන ගඟට රළ නගන්න ඔබෙ කඳුලැලි දෙන්න
ඉරට හඳට එළිය එන්න ඔබෙ හසකැන් දෙන්න
නීල වළා සළු එළන්න ඔබෙ කෙහෙරැලි දෙන්න
දේදුන්නට හැඩය ගන්න ඔබෙ නෙත් බැමි දෙන්න

තණ නිල්ලට ඔබෙ දෙපතුල මොළකැටි බව දෙන්න
නළ රැල්ලට ඔබේ සුසුම් වල සිහිලස දෙන්න
ජීවත්වන ඩිංගට මට සැනසිල්ලෙන් ඉන්න
එපා මැණිකෙ හිත පමණක් කිසිවෙකුටත් දෙන්න.......

-ප්‍රේමකීර්ති ද අල්විස්
-වික්ටර් රත්නායක

කුරුල්ලන්ට ගී ගයන්න ගීතය
පහළ සිට ඉහළට පවතින
අපව කළඹන එකාකාරී බව
අපව තෘප්තිමත් කොට නිදහස් කරන
ඝංඨා කුළුණක් වගෙයි.

යසනාත්ගේ ශෛලියෙහි ලොකු වෙනසක් නොකර
ගීතය ඉහළ තැනකට ගෙන යන්නට
ප්‍රේමකීර්තිගේ මේ ශෛලිය
උපකාරී විය හැකියි.
ප්‍රේමකීර්තිගේ
තවත් එවැනි නිර්මාණයක්, මේ.

 
කඳු මුදුනට නැගුණු එලිය ඈත ඉඳන් අත වනනව
හඳ මුදුනට එන්න කලින් අහස වලාකුලු ඉරනව
පරිසරයම හරි පාලුයි ඇඟ තුල සීතල දුවනව
අන්න බලාපන් මැණිකේ සමන් කැකුලු ඇස් අරිනව

කණාමැදිරියන් නටනව නිල් එලිකැට විලිස්සමින්
වල් බෙලිගස් නිදනු වැනිය ඇඟ පොරවා වලස්හමින්
සුළඟ තැනින් තැන දුවනව ලදළු ලපළු හිනස්සමින්
සඳ එලියට පොලොව තෙමිල පය තියන්නෙ පරිස්සමින්

පලගැටියන් වැලි කඩදහි අරගෙන ලෝකය මදිනව
තද සුළඟට පොල් අතුවල ඉරටු ඇඟිලි ඇට කැඩෙනව
හඳට බයේ අඳුරු රංචු හොරු වගෙ ගස් යට ළඟිනව
ළිඳට ගිහින් බලමු මැණිකෙ ලිඳ ඇතුලෙත් හඳ තියෙනව

කම්බි වැටට පිණි ඇමිනිල සතුටු කඳුලු බිංදු වගෙයි
මැණිකෙව කැන්දන් ආදා රැය මගෙ මතකයට නැඟෙයි
එදා වගෙම අදත් සිතට ආදරයේ සිසිල හැඟෙයි
උඹත් එක්ක - හඳ පෑවු මේ මුලු ලෝකයම මගෙයි

ආදරයෙන් නිදිමත නැති පිරුණු දෙනෙත් යුග අරින්න
නා දලු තොල් තෙත් කරවා අනුරා ගීතය ගයන්න
සඳ එළියෙන් බැහැ මැණිකේ මැණිකෙගෙ ලස්සන බලන්න
පැලට ගිහින් පැල ඇතුලේ කුප්පි ලාම්පුව නිවන්න.

හැම අතින්ම සුන්දර යුවතියක්
ඇඟ පෙන්නලා අවධානය ගැනීම
ඇගේ සොඳුරු බවට හානිකරයි..

මොහොතක් පවතින
ග්‍රාම්‍ය හැඟීමක් අවුස්සන්න
කවිකම අවශ්‍ය නෑ..
කාලාන්තරයක් පවතින
සියුම් ශෘංගාරයක්
කවියකින් ඇති කරන්න
කුණුහරුප අවශ්‍ය නෑ.

සියුම් ශෘංගාරයක් ඇති කරන
ප්‍රේමකීර්තිගේ නිර්මාණය......
ආදරයෙන් නිදිමත නැති පිරුණු දෙනෙත් යුග අරින්න
නා දලු තොල් තෙත් කරවා අනුරා ගීතය ගයන්න
සඳ එළියෙන් බැහැ මැණිකේ මැණිකෙගෙ ලස්සන බලන්න
පැලට ගිහින් පැල ඇතුලේ කුප්පි ලාම්පුව නිවන්න.

===============================================================

 මේ ලිපියට අදාළ බ්ලොග් සටහන

 එක ගලෙන් කුරුල්ලන් හතරයි.......

මේ ලිපියට අදාළ FECEBOOK සටහන 

===============================================================

මා තර්ක කරන්නේ එකම අරමුණකිනි.
මා නොදන්නා දේ දැන ගැනීමට සහ
මා දන්නා දේ පිරිසිදු කර ගැනීමටයි.

යසනාත්ගේත් රත්නශ්‍රීගේත් ගීත සැසඳීමේදී
මා යොදාගත් ක්‍රමය මට අලුත් අත්දැකීමක්.ගීත සාරාංශගත කොට විමසන්නට
මා පටන් ගත්තා.
ගීත සැසඳීමේදී
ගීතයක සැකිල්ල විමසීමට
මා පළමුවරට පෙළඹුණේ එයිනුයි.